တစ်ခါက အမေရိကန်နိုင်ငံရဲ့ တက်ဆက်ပြည်နယ်က မြို့သေးလေးတစ်ခုမှာနေတဲ့ အင်ဒီးယန်းလူနီအဖိုးကြီးတစ်ယောက်ရဲ့ အိမ်ခြံဝင်းထဲက မြေအောက်မှာ ရေနံတွေ အများကြီးရှာတွေ့တယ်။ ရေနံတူးတဲ့ ကုမ္ပဏီကြီးတစ်ခုက အဖိုးကြီးဆီကနေ အိမ်ခြံဝင်းကို ဒေါ်လာဆယ်သန်းပေးပြီး ဝယ်ယူလိုက်တယ်။ အဖိုးကြီးဟာ ရတဲ့ပိုက်ဆံတွေထဲက မြို့ပြင်တစ်နေရာမှာ ခြံလေးတစ်ခု ဝယ်ပြီး နေလိုက်တယ်။
သူဟာ တခြားအဖိုးတန်ပစ္စည်းတွေကို မဝယ်ပေမယ့်လည်း သူ တစ်သက်လုံး လိုချင်တမ်းတနေခဲ့တဲ့ အဲဒီခေတ်က ဈေးအကြီးဆုံး ကားဒီးလက်ဇိမ်ခံကားအနက်ကြီး တစ်စီးကိုတော့ ဝယ်လိုက်တယ်။သူဟာ မနက်တိုင်း အဲဒီဇိမ်ခံကားကြီးကို မောင်းပြီး ဈေးကို သွားတတ်တယ်။ လမ်းတလျှောက်မှာ ဈေးသွားဈေးပြန်တွေကို ကားပေါ်ကနေ လက်ပြနူတ်ဆက်တတ်တယ်။ အဖိုးကြီး မနက်တိုင်း လုပ်နေကျ အလုပ်တစ်ခုပါ။
လပေါင်းအတန်ကြာတဲ့အထိ ဈေးသွားဈေးပြန်တွေနဲ့ ပြည့်ကျပ်နေတဲ့ လမ်းမပေါ်မှာ သူ့ကားကြီးနဲ့ လူတိုက်မိတယ်ဆိုတာ တစ်ခါမှ မဖြစ်ခဲ့ဖူးဘူး။ ဘယ်တိုက်မိပါ့မလဲ။ စက်မနိူးထားတဲ့ သူ့ကားကြီးကို ရှေ့ကနေ မြင်းကြီး (၂) ကောင်က ကြိုးနဲ့ဆွဲသွားနေတာကိုး။ သူ့ကားကြီးရဲ့ အင်ဂျင်ပါဝါဟာ မြင်းကောင်ရေ (၁၀၀) အား ရှိပါတယ်။ ဒါပေမဲ့ သူဟာ စွမ်းအားကြီးတဲ့ အင်ဂျင်ကို မသုံးဘဲ မြင်း (၂) ကောင်အားကိုပဲသုံးပါတယ်။
ပုံပြင်လေးဟာ ရယ်စရာကောင်းတယ်လို့ ထင်ရပေမယ့် တကယ်တော့ လူတွေရဲ့သဘာဝကို ဖေါ်ကျူးထင်ဟတ်ပြလိုက်တာပါ။ လူတွေမှာ ဦးနှောက်ရှိတယ်။ ဦးနှောက်မှာ စဉ်းစားဉာဏ်ရှိတယ်။ ဦနှောက်က တီထွင်တတ်တယ်။ စိတ်ကူးစိတ်သန်းကောင်းတွေ တွေးတတ်တယ်။ ဖြစ်ချင်တာကို ဖြစ်အောင်လုပ်နိုင်တဲ့ အစွမ်းလည်းရှိတယ်။ ဒါပေမဲ့ လူတွေဟာ ဦးနှောက်ရဲ့ စွမ်းရည်ကို အပြည့်အဝ မသုံးချကြဘဲ နည်းနည်းလေးပဲ သုံးကြတယ်။
ဘယ်လောက်နည်းနည်းပဲ သုံးကြသလဲဆိုရင် စိတ်ပညာရှင်တွေရဲ့ သုတေသနစမ်းသပ်ချက်တွေအရ လူအတော်များများဟာ သူတို့ဦးနှောက်စွမ်းရည်ရဲ့ (၂) ရာခိုင်နူန်းကနေ (၅) ရာခိုင်နူန်းကိုပဲ အသုံးပြုကြတယ်တဲ့။ ကျန်တဲ့ စွမ်းရည်ရာခိုင်နူန်း ၉၀ ကျော်ကို ဘာလို့ မသုံးကြတာလဲ။ ပျင်းလို့ ဒါမှမဟုတ် ဘယ်လိုသုံးရမလဲဆိုတဲ့ နည်းကို မသိကြလို့ပါ။
ဒါဆိုရင် ဒီလောက်စွမ်းအားကြီးတဲ့ ဦးနှောက်ရဲ့ စွမ်းရည်ကို အပြည့်အဝ (၁၀၀) ရာခိုင်နူန်း မဟုတ်ရင်တောင် ရာခိုင်နူန်းအတော်များများကို သုံးနိုင်အောင် လုပ်လို့ရတဲ့ နည်းမရှိဘူးလား။ လေ့ကျင့်ပေးလို့ မရဘူးလားဆိုတာ မေးစရာဖြစ်လာပါတယ်။ လေ့ကျင့်ပေးလို့ ရပါတယ်။ ဘယ်လို လေ့ကျင့်ပေးရမလဲ။ပထမဆုံးအနေနဲ့ မနေ့က ရေးပြခဲ့သလို အကောင်းမြင်စိတ်ကို ဦးနှောက်ထဲရောက်အောင် နေ့စဉ်သွင်းပေးပါ။ ဘယ်လို သွင်းပေးရမလဲ။
အကောင်းမြင်စကားလေးတွေကို မနက်အိပ်ယာထစမှာ နေ့စဉ်ရေရွတ်ပေးပါ။ ဒီနေ့ဟာ သာယာတဲ့ နေ့တနေ့ပါ။ အလုပ်ထဲမှာ အစစအရာရာ အဆင်ပြေမှာပါ။ ပြဿနာမှန်သမျှကို ငါဖြေရှင်းပေးနိုင်မှာပါ။ တနေ့လုံး အကောင်းမြင်စိတ် ဖုံးလွှမ်းနေတဲ့ ဦးနှောက်ဟာ အောင်မြင်မှုရအောင် သင့်ကို စိတ်ခွန်အားတွေ ပေးနေပါလိမ့်မယ်။
ဒုတိယအနေနဲ့ မိမိအလုပ်အတွက် လမ်းညွှန်ပြသပေးမယ့် ဆရာတစ်ယောက်ကို ရှာပါ။ ငှားပါ။ တချို့လူတွေဟာ အရမ်းကြိုးစားကြပေမယ့် အောင်မြင်မှု မရကြဘူး။ ဘာကြောင့်လဲဆိုတော့ နည်းစနစ် မှားနေလို့ပါ။ နည်းစနစ်မှားနေတာကို သူတို့ကိုယ်တိုင် မသိကြပါဘူး။ တတ်သိနားလည်တဲ့ ဆရာတွေကသာ အမှားတွေကို မြင်တတ်ပြီး ပြင်ပေးပါလိမ့်မယ်။ အမှားတွေ ထပ်မလုပ်မိအောင် ညွှန်ကြားပြသပေးကြလိမ့်မယ်။
နှစ်ဦးချင်း ယှဉ်ပြိုင်တိုက်ခိုက်တဲ့ ပြိုင်ပွဲတွေမှာ တချို့အားကစားသမားတွေဟာ သူ့တို့ထက် ခန္ဓာကိုယ် ပိုမိုတောင့်တင်းကြံ့ခိုင်တဲ့ ပြိုင်ဖက်ကို အနိူင်ယူခဲ့တာ နည်းစနစ်ကြောင့်ပါ။ နာမည်ကျော်ကစားသမား တစ်ယောက်မှ မပါတဲ့ ဘောလုံးသင်းတစ်သင်းဟာ နာမည်ကျော်ဘောလုံးသမားတွေ အများကြီးပါတဲ့ အသင်းကို အနိူင်ယူခဲ့တာ နည်းပြဆရာရဲ့ နည်းစနစ်ကြောင့်ပါ။
တတိယအနေနဲ့ ဝါသနာပါတဲ့ အလုပ်ကို လုပ်ပါ။ လူတွေဟာ သူတို့ ဝါသနာမပါတဲ့ အလုပ်ကို လုပ်နေရရင် သူတို့ရဲ့ ကိုယ်စွမ်း ဉာဏ်စွမ်းကို အစွမ်းကုန် ထုတ်မသုံးတတ်ကြပါဘူး။ ဘာလို့ မသုံးကြတာလဲ။ စိတ်မပါကြလို့ပါ။ လူတွေဟာ ဝါသနာပါတဲ့ အလုပ်ကိုများ လုပ်နေရရင် ထမင်းမေ့ဟင်းမေ့ နေ့မနားညမနား မရပ်မနား လုပ်တတ်ကြတယ်။ အဲဒီလို လုပ်နေရင်းနဲ့လည်း သူတို့ခေါင်းထဲမှာ အတွေးသစ် ဉာဏ်သစ်တွေ ပေါ်လာတတ်ကြတယ်။
ဒါကြောင့် လူတိုင်းဟာ ဦးနှောက်ကို တန်ဖိုးထားရမယ်။ ဂရုတစိုက် ထိန်းသိမ်းစောင့်ရှောက်ရမယ်။ ဦးနှောက်ထဲကို အမှိုက်တွေ မထည့်ရဘူး။ မဟုတ်တရုတ် စာတွေ ဖတ်ခြင်း၊ အတင်းအဖျင်းစကားတွေ နားထောင်ခြင်း၊ ညစ်ညမ်းခွေတွေ ကြည့်ခြင်းစတာတွေ မလုပ်ရဘူး။ ဒါတွေဟာ ဦးနှောက်ထဲကို အမှိုက်တွေ သွန်ထည့်နေတာနဲ့ တူပါတယ်။
သံချေးတက်နေတဲ့ စက်ဟာ စွမ်းအားပြည့် မလည်ပတ်နိုင်တော့သလို ဦးနှောက်ဟာ အမှိုက်တွေနဲ့ ပြည့်နှက်နေရင် ဘယ်လိုမှ စွမ်းအားပြည့် အလုပ်လုပ်နိုင်မှာ မဟုတ်ပါဘူး။ ဦးနှောက်ထဲကို အမှိုက်တွေ ဝင်မလာအောင် ကာကွယ်ရမယ်။ ဘယ်လိုကာကွယ်မလဲ။ ဦးနှောက်ကို ခွန်အားရစေဖို့ အဟာရ ရရှိဖို့ အကျိုးရှိမယ့် စာအုပ်စာပေများကို ဖတ်ရှုပါ။ ဗဟုသုတတိုးပွားစေမယ့် ရုပ်ရှင်၊ တီဗီအစီအစဉ်တွေကို ကြည့်ပါ။
အောင်မြင်သူတွေရဲ့ ဟောပြောပွဲတွေကို တက်ရောက်နားထောင်ခြင်း၊ သူတို့ဟောပြောထားတာတွေကို ရိုက်ကူးထားတဲ့ ဒီဗီဒီအခွေတွေ ကြည့်ရှုခြင်း၊ သူတို့ဟောပြောချက်တွေကို အသံဖမ်းထားတဲ့ စီဒီခွေတွေကို နားထောင်ခြင်းများ လုပ်ပါ။
အဲဒီလို မှန်မှန်လုပ်ပေးရင် သင့်ရဲ့ဦးနှောက်စွမ်းရည်တက်လာပါလိမ့်မယ်။ ဦးနှောက်ကို နည်းနည်းပဲ သုံးသူတွေထက် အမြဲခေါင်းတစ်လုံးသာနေလိမ့်မယ်။ အခုခေတ်ဟာ လက်ရုံးရည်နဲ့ သူများကို နိူင်တဲ့ ခေတ်မဟုတ်တော့ပါ။ ဦးနှောက်သုံးသူက အနိုင်ရတဲ့ ခေတ်ဖြစ်နေပါပြီ။
Credit;ဗန်းမော်သိန်းဖေ ၁၆-၀၁-၂၀၁၇
Comments
Post a Comment